اہتمامِ رمضان

رمضان کی آمد اور چہل پہل ہر جگہ محسوس کی جا سکتی ہے۔ آپ سب کو بھی آنے والے رمضان اور اُسکی برکات بہت بہت مبارک۔ رمضان کی تیاری کیسے کی جائے اس بارے کئی لوگوں نے بات کرنے کا تذکرہ کیا۔ تو پہلے آئیے اس تیاری پہ جو رمضان کی آمد کے سلسلے میں ہر گھر میں ہوتی ہے۔

پچھلے کچھ سالوں سے رول ،سموسے بنانے کہ سلسلہ موقوف تھا کیونکہ کوشش تھی کہ تلی ہوئی چیزوں کو کم کیا جائے۔افطاری میں فروٹ چاٹ، چھولے، اور بکیڈ چیزوں پہ زور تھا اور ائر فرائر کی بدولت کچھ چیزیں مثلاً پیٹیز وغیرہ بنانا بھی آسان ہو گیا ہے۔

اس بار میں نے رول سموسے وغیرہ کا اہتمام کیا ،اسکی ایک وجہ یہ بھی تھی کہ بچے ماشااللہ بڑے ہو رہے ہیں یہ چیزیں گھر میں بنتی دیکھیں، سیکھیں اور اُنہیں اسمیں شامل کیا جائے ۔ اسکے علاوہ کھانا یا افطار الحمدلللہ گھر میں بہت بڑا مسئلہ نہیں، کسی دن افطار کسی دن کھانا کافی ہوتا ہے یوں بھی ہمارے ہاں افطار کا وقت تقریباً بجے ہے اور پھر سحری کا آغاز چار بجے کے قریب ہو جاتا ہے، اسلیے الگ الگ اہتمام کا وقت نہیں۔

صفائیاں گھر کے معمول کا حصہ ہیں، ذرا ڈیپ کلیننگ ہو تو گھر خاص لگنے لگتا ہے، باقی کچھ چیزیں ہیں جو روز استعمال ہوتی ہیں جیسے ہم عموماً جاء نمازوں کو نظر انداز کر دیتے ہیں۔یہ مسلسل استعمال ہوتی ہیں لیکن انکی دھلائی کم کم کی جاتی ہے سو گھر کی سب جا نمازیں دھو لی جائیں اور خوشبو کا استعمال کر کیا جائے تو ایک تازگی کا احساس ہوتا ہے۔ ایک گوشے میں تھوڑی سی سجاوٹ کے ساتھ قرآن اور سپارے رکھ دیے لیں کیونکہ جب چیزیں سامنے ہوں تو استعمال روٹین میں رہتا ہے۔

جس طرح اس مہینے میں جاگنے کا روٹین بدلتا ہے اسی طرح سونے کے اوقات بھی اثر انداز ہوتے ہیں، گھر کا ماحول بدلنے میں گھر کے بستر بہت اہمیت رکھتے ہیں۔صرف چادریں اور کمفرٹر کے کور بدلنے سے گھر میں نیا پن محسوس ہونے لگتا ہے ،یہ اہتمام عموماً مہمانوں کے آنے پہ ضرور کیا جاتا ہے اور رمضان تو پھر خاص مہمان ہیں۔

یہ سب کام ایک ہی دن میں سب کے ساتھ مل کے کیے جا سکتے ہیں۔کہنے کا مقصد یہ ہے کہ خود کو بیجا نہ تھکائیں۔ہے تحاشا صفائیوں اور سجاوٹوں میں خود کو ہلکان نہ کریں تاکہ عبادت میں توانائی اور وقت لگا سکیں۔

آخر میں تمام مرد حضرات سے درخواست ہے کہ افطاری اور کھانا اللّٰہ تعالیٰ کی طرف سے روزہ دار کی دو بڑی خوشیوں میں سے ایک تحفہ ہیں انہیں گھر کی خواتین کے لیے ازیت نہ بنائیں۔ یقین کریں اگر ایک دن پکوڑے نہ ہوں تو روزہ آپکا پھر بھی مقبول ہو جائیگا۔ افطار کے وقت دسترخوان یا ٹیبل پہ بیٹھ کے پکوان پہ تنقید نہ کریں، ذائقوں کی کمی بیشی کو چٹنی، کیچپ اور کئی اور نعمتوں سے پورا کیا جا سکتا ہے اسمیں اپنی باتوں اور لہجے سے کڑواہٹ گھولنے کی ضرورت نہیں۔ مجھے شدید حیرت ہوتی ہے جب نماز روزے کے پابند اور نبی کریم صلی اللہ علیہ وسلم کا ذکر عقیدت سے کرنے والے ان معملات میں آپ صلی اللہ علیہ وسلم کا رویہ بھول جاتے ہیں۔ ایک تو آپ صلی اللہ علیہ وسلم اپنی ازواج کا ہاتھ بٹاتےتھے پھر آپ صلی اللہ علیہ وسلم نے کبھی کھانے میں عیب نہیں نکالا۔ پسند آئے تو تعریف کر کے کھائیں اور کچھ پسند نہ آئے تو خاموشی سے چھوڑ دیں۔ خواتین کے کاموں کی قدر کریں کہ وہ بھی آپ ہی کے جیسا روزہ رکھ کے پسینہ میں شرابور آپ کے لیے انواع اقسام کی چیزوں کا اہتمام کرتی ہیں۔

دوسری طرف خواتین بھی مردوں کے ان رویوں کی تھوڑی بہت ذمےدار ہیں۔ اکثر جب آپ بار بار یہ اعلان کرتی رہتی ہیں کہ "یہ تو ذرا ایسا ویسا پکا ہو تو کبھی نہ کھائیں" تو "یہ" کچھ ایسا سن سن کے بھی خود کو تھوڑا اعلیٰ تصور کرنے لگتے ہیں اور اسے ثابت کرنے کے لیے بھی کبھی کبھی چھوٹی چھوٹی چیزوں پہ بلا وجہ تنقید اپنا فرض سمجھتے ہیں پھر یہی رویہ دیکھ کے بچے بھی لاشعوری طور پہ اسے اپناتے ہیں اور مستقبل میں کسی کے لیے ایک اور تنقید نگار شوہر تیار ہو رہا ہوتا ہے۔

ہم سب انسان ہیں اور ہم سب کو چھوٹی چھوٹی باتوں میں اصلاح کی ضرورت ہوتی ہے ، ہر منفی رویئے کو قبول کرتے رہنا بھی اسکو پروان چڑھانے کے مترادف ہے اسلیے موقع محل کے مطابق اس بارے میں بات کریں اور سمجھانے کی کوشش کریں۔ دعاؤں میں یاد رکھئے اللّٰہ تعالیٰ ہمیں اس مہینے سے بھرپور فیض حاصل کرنے کی توفیق دیں،آمین

قرۃ العین صبا